Okeanın ortasında ölümcül tikili

Atlantik Okeanının ortasında, İslandiya sahillərindəki nəhəng bir qayanın zirvəsində yerləşən Thridrangaviti Dəniz Fənəri dünyanın ən təhlükəli məkanlarından biri hesab olunur. Təbii gözəlliyi və insan əli ilə yaradılan bu möhtəşəm tikilinin çətinliyi onu macəra axtaranların və fotoqrafların gözündə cəlbedici edir. Yerli əhali arasında Thridarangar olaraq da tanınan bu tikili, dəniz səviyyəsindən təxminən 40 metr yüksəklikdə, sıldırım qayalıqların üzərində qərarlaşıb. Fənər bu ada ölkəsinin cənub-qərb sahillərindən təxminən 7 kilometr (4,5 mil) aralıda, dənizin dərinliklərində təkbaşına yüksəlir. Onun əzəməti ilə yanaşı, əlçatmazlığı da diqqəti cəlb edir. Bura nə quru, nə də dəniz yolu ilə çatmaq mümkündür. Fənəri görmək istəyənlər yalnız helikopterlə gələ bilər və ya peşəkar alpinist avadanlıqları ilə riskli bir dırmaşma etmək məcburiyyətindədir. Dənizin daimi çalxalanması və küləklərin şiddəti səbəbindən ən kiçik bir səhv belə, aşağıdakı iti qayalar səbəbindən ölümcül nəticələrə yol aça bilər. Bu səbəbdən, fənərə çatmaq real bir cəsarət tələb edir.

THRIDRANGAVİTİ DƏNİZ FƏNƏRİNİN İNŞASI

Thridrangaviti Dəniz Fənəri 1938-1939-cu illər arasında, hələ helikopter texnologiyasının inkişaf etmədiyi bir dövrdə inşa edilib. Bu nəhəng layihə, yalnız insan gücü və iradəsi ilə həyata keçirilib. Təcrübəli İslandiyalı alpinistlərdən ibarət bir qrup, materialları hissə-hissə qayalıq zirvəyə əl ilə daşıyaraq bu dəniz fənərini addım-addım tamamlamışdır. Tikinti bir ildən çox davam etmiş və o dövrün şərtlərində misilsiz bir mühəndislik nailiyyəti hesab olunur. Bu tikinti, dənizçilik tarixində mühüm bir iz qoymuşdur. 1950-ci ildə bölgədə kiçik bir helikopter meydançası inşa edilsə də, fənər hələ də “dünyanın ən təcrid olunmuş dəniz fənəri” olaraq xatırlanır. Ağ betondan tikilmiş bu tikili qırmızı dam ilə tamamlanır və ətrafındakı boz qayalıqlarla kontrast təşkil edir. 1990-cı ildə isə fənər enerji təchizatını daha səmərəli etmək məqsədilə günəş enerjisi ilə işləyən müasir bir sistemə çevrilib. Bu yenilik, onun müstəqilliyini daha da artırıb.

ADININ MƏNASI VƏ RİSKLİ ZİYARƏTLƏR

Fənərin yerləşdiyi bölgə, adını ətrafındakı üç böyük dəniz qayalığından (Thridrangar) götürüb. İslandiya dilində “Thridrangaviti” sözü “Üç Qayalıq Dəniz Fənəri” mənasını verir. Bu ad, fənərin özünəməxsus coğrafi mühitini mükəmməl şəkildə əks etdirir. Bu gün Thridrangaviti həm təbiət həvəskarlarının, həm də fotoqrafların marağını cəlb edən əfsanəvi bir quruluşa çevrilib. Onun heyrətamiz mənzərələri və əlçatmazlığı çoxlarının xəyalını bəzəyir. Lakin çətin coğrafi mövqeyi səbəbindən bu Atlantik Okeanındakı fənəri yaxından görmək hələ də həyati risk daşıyır. Fənərin sirli və təhlükəli aurası onu dünyanın ən unikal tikililərindən birinə çevirir.

24 saat